上周周末票房，雖有《盜海豪情13王牌》，但氣勢遠不如之前兩部續集電影「壟斷」，結果開畫數字亦不能同日而語，五十九院周日收約一百五十萬。入院情況亦不如過往數周，不知是否考試期近還是大家仍等待其他大片所致。
至於之前兩部大堆頭電影，《魔盜王終極之戰》周末亦收逾百萬，累積三千八百萬。但要破《蜘蛛俠３》近五千五百萬票房，恐怕遙不可及。而事前看淡的《我愛籮霸》雖然開畫戲院不多，但周日收三十六萬，也算有所交代。反觀同周開畫日本電影《戀愛初稿》仿如被掉進廢紙廂一樣，七院只收三萬。
《單身部落》雖然每院平均收五千左右，但累積卻有二百一十三萬。以這類款式的電影而言，票房看來十分好看。而《愛情回水》可謂口碑帶動強勁後勁，兩院也可收六萬。至於配音韓片《醜女大翻身》，累收逾三百七十萬，算是為近年視為票房毒藥的韓片挽回一點顏臉。
至於《綁架》，雖然周日不少戲院映兩至三場，但票房不足三萬，十大不入。希望優先場口碑能令周四的開畫數字好一點。
小夢
我愛蘿霸好笑吖麻，應該會港人口味。
嗰日去睇綁架真係得小貓三四隻，可能好多人想睇吓其他人睇咗覺得好睇先去睇卦，又或者無咩人知道有優先場都未定。︰p
ryanlob
此片最多收3-4百萬
Ryan
小夢：得啖笑的片，的確有時很有市場。至於《綁架》，優先場消息很不流通，也影響票房。
Ryan
ryanlob: 有四百萬都算難得了。
小夢
點解大家咁睇淡既？我覺得套片真係好好睇喎。^ ^
Ben
講真，唔係睇你呢度我真係唔知有優先場…
當我知ge時候已經係安排唔到時間去睇…
Jess
我未睇= =但我一定會睇2次
好多人仲考緊試…近呢個星期d票房應該唔會好多…月底可能票房有增長
btw…票房對我黎講都唔係咁重要^^最緊要套戲係咪值得去睇~
Ryan
過去歷史講到係，電影質素不一定跟票房成正比。
本月大量港片供應，月底播《每當變幻時》，還有多少院每天五場播《綁架》已是一大問題。
票房對觀眾係唔重要，但對俾錢拍戲的製作人就好重要。無利可圖，還值得投資麼？
Ryan
Ben: 而家特別場往往來得不明所以地神秘，走漏眼絕不出奇。
Charlie
我星期日係太古睇5點,都有一半入坐率. 其實套戲唔錯,但有別於一般警片. 令我想起”傷城”,係一般查案情節上講多d角色心理.
希望觀眾接受多d不同的戲,因為咁先多d選擇.
Ryan
Charlie: 兩個女角的戲，在香港一向都唔易賣座。不過有一半入座已算難得。